Gikalro ni Department of National Defense Secretary Gilberto Teodoro, nga walay bag-ong kontrata ang Pilipinas sa Israel human gipangutana atol sa budget hearing sa House Committee on Appropriations kalabot sa nagpadayong kontrata sa pagpalit og armas.
Matod sa kalihim, ang ₱248M nga pagpalit sa 100 ka rounds sa 155mm precision guided-munition gikan sa Israeli firm nga Elbit Systems, kabahin gihapon sa miaging kontrata ug dili bag-ong kasabutan.
Nitungha ang isyu, human gihagit ni Kabataan Party-list Rep. Renee Co ang DND, nanawagan nga putlon ang relasyon sa Israel tungod sa nagpadayong genocide o pagpamomba sa Gaza. Gipasabot ni Sec. Teodoro, nga mas praktikal ang pagpadayon sa kasamtangang sistema kay sa pagpalit og bag-o nga magkinahanglan og dakong pundo gikan sa modernization program.
Bisan pa, giangkon niya nga aduna usab siya’y mga kabalaka bahin sa kasabutan, dili lamang tungod sa kahimtang sa Gaza, apan bahin usab sa seguridad sa mga suplay sa armas gikan sa Israel.
Kalabot niini, matod sa kalihim, mohimo sila og case study aron mapalapdan ang tinubdan sa suplay.
Photo courtesy:PNA
