Usa ka circus performer ang nakabuhat og talagsaon nga Guinness World Record human niya maalsa ang tulo ka tawo gamit lang ang iyang ngipon, samtang siya nagbitay nga baliktad.
Si Michael Radiff nga gikan sa Estados Unidos (U.S.) ang mipakita sa iyang abilidad sa usa ka live audience sa Taipei City, Songshan District, Taiwan niadtong Mayo.
Iyaha kining nabuhat sa pag-alsa sa kinatibuk-ang gibug-aton nga 185.80 kg, ug tungod niini nakuha niya ang titulo nga:”Heaviest weight held with the teeth while suspended upside down.”
Sa usa ka trending nga video, makita si Radiff nga nagbitay nga pabaliktad, samtang gigunitan niya ang mouthguard nga gitapotan og strap ug metal bar. Samtang gialsa niya, ang tuló sa iyang mga kauban nga performers duha ka babaye ug usa ka lalaki ang sabay nga gibutang sa bar nga iyang gihuptan gamit ang iyang baba.
Sa pipila ka gutlo, gibuhian ni Radiff ang metal bar nga iyang gihuptan sa kamot, ug ang tibuok gibug-aton sa tulo ka tawo nakapunting tanan sa iyang ngipon ug panga.
Isip usa ka strength performance specialist, gipangandaman gyud ni Radiff kini nga performance pinaagi sa pagpalig-on sa iyang panga, liog, ug pag-ehersisyo sa core nga baliktad. Base sa mga lagda sa Guinness, ang gibug-aton kinahanglan maalsa bisan 15 cm gikan sa yuta ug dapat mabuhat sulod sa dili moubos sa 10 segundos.
Nalabwan ni Radiff ang karaang record nga 130 kg, nga nabuhat ni Loretta Antal sa Hungary niadtong Enero 27, 2024.
Photo courtesy:Guinness World Record
