Naguol si People’s Champion Manny Pacquiao sa pagtaliwan ni Ricky Hatton, usa sa iyang mga higala sa boksing. Sumala sa mga taho, nakit-an nga patay si Hatton sa iyang balay sa Greater Manchester, hinungdan nga nakurat ang iyang mga kaubang boksingero sa dili maayong balita nga mibuto kaniadtong Domingo.
Si Hatton, usa ka Boxing Hall of Fame inductee, 46 anyos pa lang. Wala pa usab matino ang hinungdan sa kamatayon niini. Nakalaban ni Pacquaio si Hatton niadtong 2009, diin nakaiskor siya og second-round knockout nga kadaugan sa MGM Grand Garden Arena sa Las Vegas, Nevada.
Gihulagway ni Pacquiao nga usa ka bantugang boksidor si Hatton ug giisip usab niya kini nga maayong higala. Gihatagan usab og pasidungog ni Pacquiao ang kaisog ni Hatton sulod ug gawas sa ring nga dili niya makalimtan sa iyang karera sa boksing.
Miretiro si Hatton niadtong 2012 human mapildi sa Ukraine nga si Vyacheslav Senchenko pinaagi sa ninth-round knockout sa Manchester, England.
Photo courtesy:MSN
