Nasikop ang duha ka lalaki ug usa ka babaye atol sa gihimong entrapment operation sa CIDG Provincial Field Unit pasado alas-3 sa hapon, Martes, Setyembre 16, 2025, sa Purok 1, Barangay Linabo, Malaybalay City, Bukidnon.
Giila ang mga dinakpan sa alyas Junex, 25 anyos; alyas Garry, 35 anyos; ug si Angela Ontao, 25 anyos, residente sa Barangay Maligaya, ning syudad.
Subay sa inisyal nga report, lima unta ka mga indibidwal ang target sa operasyon, apan nakabantay ang uban rason sa pagbinayloay ug bala ug daling miikyas padulong sa likod sa Linabo Central School nga nakahatag trauma sa mga estudyante ang buto sa mga armas.
Miresulta ang operasyon pagkumpiska gikan sa suspetsado ang nagkalain-laing klase sa armas sama sa usa ka .45 calibre pistol, usa ka steel magazine para sa .45 nga pistola, tulo ka cartridges sa .45, usa ka carbine rifle, siyam ka cartridges sa carbine rifle, usa ka magazine para sa carbine rifle, ug usa ka unit nga 5.56 revolver.
Nakuha usab ang boodle money nga kapin 100 mil pesos, P500 nga marked money, ug tulo ka single motor nga gigamit sa mga isip gateway sa mga suspetsado.
Sa pagkakaron, anaa na sa kustodiya sa Criminal Investigation and Detection Group (CIDG) Bukidnon ang mga dinakpan ug ebidensiya alang sa dokumentasyon ug tukmang disposisyon.
Samtang, padayon ang hot pursuit operation alang sa duha pa ka suspetsado nga nakaikyas.
