Gikumpirma ni DPWH Secretary Vince Dizon, nga dugay nang problema sa Department of Public Works and Highways, ilabina sa quality control sa mga proyekto niini.
Sumala pa, nga sulod lang sa duha ka semana sukad sa iyang paglingkod sa maong ahensya, namatikdan na kining maong problema ug kanunay na kining makadungog og mga reklamo bahin niini.
Dugang pa, mismong mga personahe ug opisyal sa DPWH ang nagpadayag sa ilang kabalaka tungod dili sila makasusi pag-ayo sa kalidad sa mga proyekto nga gipatuman sa ahensya.
Giingong gipasabot niya, nga nag-unang rason niini mao ang kakulang sa igong personahe nga gitahasan sa pagmonitor ug pagsiguro sa kalidad sa matag proyekto.
Saysay ni Dizon, nga iya ng nadunggan kaniadto kining mga argumento gikan kang Henry Alcantara, ug bisan sa ubang mga suspek sa nagkadaiyang kaso.
Giingon usab ni Dizon nga ang gidaghanon sa mga proyekto sa DPWH usa usab ka pasangil nga gihatag sa mga personahe kung nganong dili sila maka-monitor sa kalidad niini.
Tungod sa kadaghan sa mga proyekto nga dungan nga gipatuman, ang mga empleyado naglisud sa pag-monitor sa matag usa ug pagsiguro nga ang gikinahanglan nga mga sumbanan sa kalidad natuman.
Sa pagkakaron, hugot nga gipahayag ni Dizon nga kinahanglang usbon ang sistema sa maong ahensya.
Photo courtesy:Businessworld online
