Liboan ka mga tawo ang nagprotesta sa Ankara, Turkey ug nanawagan nga moluwat na sa pwesto si Presidente Recep Tayyip Erdogan.
Gihimo sa pipila ka mga lungsuranon sa Turkey ang rally human sa daghang tuig nga legal crackdown sa mga miyembro sa Republican People’s Party (CHP). Nakadugang pa niini ang nag-ung-ong nga pagpalagpot sa kasamtangang lider sa Republican People’s Party (CHP) ug lider sa Main Opposition nga si Ozgur Ozel, taliwala sa gikatakdang hukom sa korte.
Sa hearing kagahapong adlawa, gikatakda nga balihon ang resulta sa botohan sa CHP congress niadtong Nobyembre 2023 tungod sa giingong nahitabong pagpanglimbong sa mga boto.
Apan, aron ipakita ang pagsupak sa hearing batok sa Opposition leader, nagpundok ang mga miyembro sa partido sa Tandogan Square sa Ankara, usa ka gabii sa wala pa ang hearing. Sa usa ka footage, madungog ang mga protester nga nagsinggit alang sa pagnaog sa Presidente sa Turkey samtang gikayab ang bandila sa ilang nasod ug mga banner sa partido.
Gikondena ni Ozel ang himuong hearing isip kabahin sa giingong kudeta sa gobyerno sa Turkey batok sa oposisyon. Gitawag usab niya ang kaso nga politically-motivated ug ang mga alegasyon usa ka matang sa slander.
Una na niini, gatusan na ka miyembro sa partido ang napriso tungod sa akusasyon sa korapsyon ug terorismo, apil na ang pangunang kaatbang sa politika ni Erdogan nga si Istanbul Mayor Ekrem Imamoglu.
Photo courtesy: Presidency of the Republic of Türkiye
