Gibutyag sa Philippine Anti-Corruption Czar (PACC) ang posibleng anomalya sa ₱96.5-milyones nga proyekto sa flood mitigation sa Sitio Lagaan, Barangay Apo Macote, Malaybalay City.
Ang maong proyekto nga gi-implementar sa DPWH Bukidnon 2nd District Engineering Office ug gi-award sa Rosbill Construction and Supply, adunay dakong mga crack, guba nga pundasyon, kulang nga sheet piles ug daghang wala matapos nga bahin kung asa giabandona sa kontraktor.
Atol sa ocular inspection niaging Setyembre 14, 2025 nga gipangulohan ni PACC Chairman Doc. Louie F. Ceniza, PhD, uban ni BOT Pastor Allan Japor, nakumpirma ang mga kakulangan ug kapakyasan sa kalidad sa konstruksyon.
Gipasabot sa mga residente nga dugay na nila gireklamo ang mga buak ug guba nga bahin sa proyekto ngadto sa DPWH, apan wala kini tagda, diin sa pagkakaron, nagpabilin kining peligro ug hulga sa kahimtang sa mga mag-uuma ug lumolupyo sa lugar labi na karong ting-ulan.
Matod pa ni Chairman Ceniza, dili lamang kini pagpasagad nga trabaho apan usa ka klarong paglapas sa engineering standards ug posibleng korapsyon sa pondo sa gobyerno.
Nangayo ang PACC og full forensic audit gikan sa DPWH Central Office, pagpanubag sa mga responsable nga personnel sa DPWH, ug blacklisting batok sa Rosbill Construction.
Sumala pa nga kinahanglan nga adunay hustisya ug aksyon sa dili pa mahitabo ang mas grabe nga katalagman
via: Philippine Anti-Corruption Czar
