MATI CITY- Gipahibalo sa Davao Oriental Police Provincial Office – DOPPO ang hugot nga pagpatuman sa curfew alang sa mga menor de edad diin magsugod alas 10 sa gabii hangtod alas 5 sa buntag. Ang lakang kabahin sa ordinansa nga gituyo aron maprotektahan ang seguridad ug kaayohan sa kabatan-onan sa tibuok probinsya.
Gisaysay sa DOPPO nga ang unang silot sa mga menor de edad nga masakpan sa oras sa curfew mao ang pagpa-ilalom sa counselling sa estasyon sa kapulisan o sa barangay hall sa dili pa sila ibalik sa ilang ginikanan o guardian. Sa mga lugar nga walay kapulisan, ang tanod ug opisyales sa barangay otorisado nga mopatuman sa maong curfew.
Gibutyag usab sa DOPPO nga ang mga ginikanan sa mga menor de edad makaatubang usab og silot: una nga silot– counselling; ikaduha – 2 ka oras nga community service; ikatulo ug sunod pa – multa nga ₱1,000 ug referral sa DSWD alang sa tukmang aksyon.
Ang publiko gidasig nga makigtambayayong sa pagpatuman niini pinaagi sa pagpahimangno sa ilang mga anak ug pagsunod sa mga palisiya. Alang sa mga reklamo o pangutana, tawagi ang WCPD DOPPO Hotline sa 0919 748 3338.
