TAGUM CITY -Gisalmotan sa mga pot-pot o trysikad drivers ug nagpakita sa ilang kahanas sa pagpadyak ang gipahigayong Padyak Race 2025 sa lungsod sa Kapalong, nga natigayon sa mga nag-unang kadalanan sa Poblacion Maniki, sa nahisgutang munisipalidad niadtong nakalabay nga adlaw.
Gitambungan ang maong kalihukan sa bise Mayor Maria Theresa R. Timbol, mga kawani sa lokal nga panggamhanan, kapulisan ug uban pang stakeholders.
Mipadayag ang bise Mayor sa iyang mensahe sa iyang dako nga kalipay gumikan garbo sa Kapalong ang potpot o trysikad nga hantod karon, padayon gihapong makita sa lungsod nga diin mao ang kanunay nga gina sakyan sa mga tao nga mo adto sa palengke, og ingon man sa mga studyante nga mo adto usab sa ilang mga skwelahan.
Nagpasalamat usab ang bise Mayor sa asosasyon sa potpot drivers sa ilang pag-apil ug pag hatag supporta sa maong aktibidad.
Samtang nagpahinumdom usab siya nga kanunay mag-amping ang mga drivers sa ilang tagsa-tagsa ka mga byahe tungod sagad sa mga pasahero mga studyante.
Ang Padyak Race 2025 dungan sa gipahigayong Farmer’s Market kagahapong adlawa diin kabahin sa linya sa mga aktibidad sa 77th Araw ng Kapalong Davao del Norte.
