TAGUM CITY- Patay nang nakaplagan ang usa ka 36-anyos nga lalaki human gikaingong naghikog sa Purok 6, I-Care Lawis, Barangay Ising, Carmen, Davao del Norte, niadtong Hulyo 27, 2025 sa buntag.
Nakadawat og report ang Carmen Municipal Police Station bandang alas 7:55 sa buntag gikan sa usa ka concern citizen kalabot sa maong insidente.
Base sa impormasyon, nagpadala si PCPT Juvy Tinga og mobile patrol team sa maong dapit ug sa imbestigasyon nasayran nga ang biktima giilang si Joel Eligio Balidio, kinsa nadiskubrehan sa iyang 22-anyos nga live-in partner nga si May Carin Cuyos, nga nagbitay sulod sa ilang pinuy-anan bandang alas 6:47 sa buntag.
Si Cuyos, usa ka self-employed, niasoy nga si Balidio giingong nigamit og strap sa panapton nga gihigot sa kahoy sa atop sa ilang sala.
Ang LGU Carmen Rescue Team gipangulohan ni Jovel Tutor daling niresponde ug gihatod ang biktima sa Carmen District Hospital. Apan, gideklarar kining dead on arrival alas 8:05 sa buntag pinaagi sa attending physician nga si Dr. Mary Joy Ponce De Leon.
Samtang wala’y gitaho nga timailhan sa foul play ang mga awtoridad, base sa mga pahayag sa kauban sa biktima ug resulta sa imbestigasyon sa pulisya.
