TAGUM CITY- Nadakpan na ang giingong suspek sa pagpamusil-patay sa usa ka Eduardo Bergantin sa Prk. 4, Gumamela Drive, Brgy. Apokon syudad sa Tagum, niadtong nakalabay nga adlaw.
Subay sa report sa kapulisan sa Tagum City pinaagi ni OIC PLtCol Frederick Deles, nga nasikop ang maong suspetsado pinaagi sa gipahigayong Hot pursuit operation human sa nahitabong pagpamusil sa naasoy nga lungsod sulod lamang sa 15 oras.
Gumikan sa paglapas niini sa Republic Act 10591 kon Comprehensive Firearms and Ammunition Regulation Act, nasikop ang maong suspek alas 10:45 sa gabie Hulyo 25, 2025 sa giabangang apartment sa Prk. Galingan, Brgy. Mankilam ning dakbayan.
Giila kining usa ka alyas “Jay-r” 27 anyos, ulitawo, ug usa laborer. Sumala pa ni OIC PLtCol Deles, ang suspek gitudlong responsable sa pagpamusil-patay sa Brgy. Apokon, diin narekober usab sa iyang posisyon ang usa ka .45 kalibre nga pistola, usa ka magazine nga loaded og walo ka mga bala.
Narekober usab sa posesyon niini ang nagkadaiyang gidak-on nga pakete sa gituohang shabu nga mobalor ngadto sa P13,600 base sa Standard Drug Price.
Sa pagkakaron ang suspek anaa na sa kustodiya sa Tagum City Police Station custodial facility ug gikatakdang mag-atubang sa patong-patong nga kaso nga ipahamtang kaniya subay sa balaod.
Source: PNP Tagum
