Misangko na sa 25 ka lokal nga kagamhanan sa rehiyon sa Caraga ang nagdeklarar og State of Calamity tungod sa grabeng hulaw nga nakaapekto sa sektor sa agrikultura, diin gibanabanang mikabat na sa 500 milyones pesos ang kantidad sa damyos.
Sumala ni Carlo Becera, Information Officer sa Office of Civil Defense o OCD-Caraga, lakip sa mga lugar nga nagdeklarar og State of Calamity ang mga probinsya sa Dinagat Islands ug Agusan del Sur, Butuan City, ug ang mga lungsod sa Carmen ug Lanuza sa Surigao del Sur, ingon man ang Las Nieves sa Agusan del Norte.
Gipasabot nga ang dakong kadaot sa agrikultura maoy usa sa mga hinungdan sa pagdeklara sa maong kahimtang aron mapadali ang paghatag og tabang sa mga apektadong komunidad.
Taliwala pa niini, giawhag sa OCD-Caraga ang mga lokal nga kagamhanan nga husto ug maampingong gamiton ang ilang calamity funds ug dili hutdon alang lamang sa hulaw, tungod kay posible pang adunay laing kalamidad nga mahitabo sa dili pa matapos ang tuig.
Gilusad na usab sa OCD ug Regional Disaster Risk Reduction and Management Council-Caraga ang El Niño Action Plan 2026 aron mapalig-on ang mga lakang sa pagpangandam ug pagtubag sa hulaw ug grabeng kainit sa tibuok rehiyon.
