Naangol ang usa ka 26-anyos nga lalaki nga giilang si alyas “Jes,” residente sa Barangay Marcos, human maaksidente samtang nagsakay sa iyang motorsiklo tungod sa kalit nga pagtabok sa usa ka iro sa dalan. Nahitabo ang insidente sa Poblacion Zone 3, Baybay City, kagahapon.
Matod sa mga awtoridad, kalit nga mitabok sa karsada ang usa ka iro nga walay tag-iya ug nabanggaan kini sa motorsiklo nga gimaneho sa biktima, hinungdan sa aksidente. Nakaangkon ang biktima og dislokasyon sa wala nga abaga ug gagmayng mga samad sa nagkalainlaing bahin sa iyang lawas.
Dali namang niresponde ang Baybay Emergency Response Unit kon BERU human makadawat og sumbong gikan sa usa ka concerned citizen. Pag-abot sa lugar, gihatagan dayon og first aid ang biktima sa wala pa siya gidala sa Baybay City Immaculate Conception Hospital o BCICH alang sa dugang nga medical evaluation ug pagtambal.
Photo courtesy: Beru- Baybay City
