Ginkilala ang mga nagkalain-lain nga partner organizations sang banwa sang Lutayan, Sultan Kudarat pinaagi sa Municipal Sandugo Awards 2026, bilang kabahin sang Opening Salvo sang ika-26 nga Kanduli Festival kag ika-59 nga Founding Anniversary sang banwa.
Ang pagkilala ginhatag sa mga Barangay Local Government Units, National Line Agencies, learning institutions kag non-government organizations bangod sa ila suporta kag kontribusyon sa kampanya para sa 100 porsyento nga voluntary non-remunerated blood donation kag sa masiguro nga may luwas kag masaligan nga suplay sang dugo para sa tanan.
Ang Sandugo Awards nagahatag importansya sa pagbinuligay, pagkamabinuligon kag dedikasyon sang mga partner sa pagluwas sang kabuhi pinaagi sa boluntaryo nga pagdonar sang dugo.
Pinaagi sa sini nga pagkilala, ginapabaskog sang lokal nga panguluhan ang panawagan nga padayon nga magbinuligay ang komunidad sa pagpromotar sang boluntaryo nga pagdonar sang dugo kag sa pagluwas sang mas madamo nga kabuhi.
Photo courtesy: Kililintad Lutayan-Municipal Health and Nutrition Office
