Mokabat sa ₱810,000 ang gibanabana nga kantidad sa ilegal nga kahoy ang nasakmit sa kapulisan atol sa operasyon batok sa ilegal nga pagpamutol ug pagbaligya sa kahoy sa kabukiran sa B1 Area, KM 38, Barangay Pakwan, Lanuza, Surigao del Sur, niadtong nakalabay nga adlaw.
Duha ka indibidwal ang gidakop sa hiniusang operasyon nga gipahigayon sa Regional Intelligence Division 13, kauban ang 1302nd Maneuver Company sa Regional Mobile Force Battalion 13, Lanuza Municipal Police Station (MPS), ug Department of Environment and Natural Resources (DENR)–Regional Enforcement Unit.
Sumala kang PBGen Rolindo M. Suguilon, regional director sa Police Regional Office 13 (PRO 13), ang operasyon gitumong sa pagsumpo sa ilegal nga pagpahimulos sa mga kahinguhaan sa kalasangan.
Giila ang mga gidakop pinaagi sa alyas nga “Juvie,” 39 anyos, residente sa Purok 9, Barangay Caromata, San Miguel, ug alyas “Jerome,” 33 anyos, residente sa Purok Malinawon, Barangay Maitum, Tandag City. Ang duha mga residente sa Surigao del Sur.
Gibanabanang 18,000 board feet sa mga kahoy nga Lauan, Yakal, ug Tangili ang nasakmit sa mga operatiba atol sa maong operasyon. Nasakmit usab ang usa ka blue nga RUSI Chariot nga gituohang gigamit sa pagdala o pagbiyahe sa maong mga kahoy.
Matod sa kapulisan, ang maong operasyon kabahin sa padayon nga paningkamot sa mga otoridad sa pagbatok sa ilegal nga pagpahimulos sa kalasangan ug pagpanalipod sa kinaiyahan.
Ang mga nasakmit nga kahoy anaa na karon sa kustodiya sa Community Environment and Natural Resources Office (CENRO) sa Cantilan, Surigao del Sur. Samtang, ang duha ka gidakop gipabilin sa Lanuza Municipal Police Station samtang giandam ang pagpasaka sa mga kaso batok kanila tungod sa giingong paglapas sa Presidential Decree No. 705, o ang Revised Forestry Code of the Philippines.
Photo courtesy: Police Regional Office 13
