Nagapanguna ang Sultan Kudarat sa mga probinsya kag Highly Urbanized City sa SOCCSKSARGEN sa bahin sang ekonomiya nga halin sa agrikultura, forestry kag pangisda, suno sa datos sang Philippine Statistics Authority ukon PSA para sa 2025.
Suno sa Philippine Statistics Authority (PSA), nakaamot sang 33 porsyento ang sini nga sektor sa ekonomiya sang Sultan Kudarat, nga mas mataas kon ikumparar sa Sarangani nga may 29.4 porsyento, Cotabato nga may 25.8 porsyento, South Cotabato nga may 24.7 porsyento, kag General Santos City nga may 11.3 porsyento.
Samtang, nakaamot sang 46.3 porsyento ang sektor sang serbisyo, kag 20.6 porsyento naman ang sektor sang industriya.
Ginatutukan sang panguluhan sang probinsya ang pagpalapad sang pagproseso sang mga produkto sa agrikultura kag ang pagpauswag sang industriya sang paghimo sang mga produkto. Lakip diri ang pagdugang sang produksyon sang kape, palm oil kag bugas agud madugangan ang mga oportunidad sa trabaho kag mapataas ang balor sang mga lokal nga produkto.
Kabahin ini sang estratehiya sang probinsya padulong sa mas malig-on kag nagadamo nga mga sektor sang ekonomiya sa 2030.
Photo courtesy: PSA- Sultan Kudarat
