Makapalit na og bugas nga tag-₱20 kada kilo ang mga residente sa Lanuza, Surigao del Sur pinaagi sa programa sa gobyerno nga nagtumong sa paghatag og mas barato nga bugas sa mga Pilipino.
Ang Bunga Samahang Nayon Multi-Purpose Cooperative (BUSANAMCO) ang nahimong sentro sa pagbaligya sa maong bugas pinaagi sa kasabutan niini ug sa Food Terminal Incorporated (FTI).
Pormal nga gisugdan ang pagbaligya niadtong Oktubre 6, atol sa usa ka kalihokan nga gitambongan nila Lanuza Mayor Geri H. Irizari, Councilor Annielyn M. Suñir, Municipal Agriculturist Engr. Richard Orillaneda, ug mga representante sa Agribusiness and Marketing Assistance Division (AMAD) sa Department of Agriculture-Caraga.
Nalipay ang mga residente sa pag-abot sa maong programa tungod kay makatabang kini sa pagpakunhod sa ilang gasto sa pagkaon ug sa pagtipig sa kuwarta alang sa ubang panginahanglan sa pamilya.
photo courtesy: Department of Agriculture – Caraga
