Sikop ang usa ka hamtong nga lalaki nga residente sa lungsod sa Ipil a buy-bust operation nga gipahigayon sa mga sakop sa Municipal Drug Enforcement Team sa Titay Municipal Police Station, kauban ang Zamboanga Sibugay 2nd Provincial Mobile Force Company, sa Barangay Namnama, Titay, Zamboanga Sibugay, niadtong nakalabay nga adlaw.
Sa maong operasyon, upat ka gagmayng plastic sachet nga adunay puti nga kristal nga substansiya nga gidudahang shabu ang nakumpiska gikan sa suspek. Ang maong ilegal nga droga adunay gibana-banang gibug-aton nga usa ka gramo ug kantidad nga 6,800 pesos. Narekober usab ang usa ka itom nga pitaka nga gigamit isip sudlanan, usa ka brown nga sling bag ug usa ka 500-pesos nga marked money.
Gipahigayon ang imbentaryo sa mga nakumpiskang ebidensiya atubangan sa usa ka konsehal sa Barangay Namnama, representante sa media ug usa ka human rights personnel sa kapulisan. Gigamit usab sa mga operatiba ang body-worn camera ug laing alternatibong recording device atol sa operasyon.
Gipahibalo ang dinakpan sa iyang mga katungod ubos sa Miranda Doctrine, lakip ang hinungdan sa iyang pagdakop ug ang pasidaan batok sa torture, sa pinulongang iyang nasabtan. Gidala ang suspek sa Titay Municipal Police Station alang sa tukmang disposisyon ug pagpasaka sa kaso tungod sa paglapas sa Republic Act 9165 o Comprehensive Dangerous Drugs Act of 2002, samtang ang mga nakumpiskang droga ipadala sa Zamboanga Sibugay Provincial Forensic Unit alang sa eksaminasyon.
