Narekober sang Lambayong Municipal Police Station ang isa ka Mitsubishi Xpander nga ginreport nga nadula matapos ini gin-rentahan sa Koronadal City kag wala ginbalik sa tag-iya sa ginkasugtan nga petsa.
Suno sa pauna nga imbestigasyon, gin-rentahan ang salakyan sang Setyembre 26, apang wala ini ginbalik tubtob sa ginkasugtan nga deadline kun sa diin ginreport ini sang tag-iya sa Koronadal City Police Station.
Pinaagi sa GPS tracking system sang salakyan, nasubay sa Barangay Palumbe, Lambayong, Sultan Kudarat. Gilayon nga nagpadulong ang mga pulis sa lugar kag nakit-an ang salakyan kaupod ang isa ka lalaki nga residente sang Tacurong City.
Nakilala sang tag-iya ang salakyan kag nagpresentar sang mga dokumento bilang pamatuod sang iya pagpanag-iya. Ang salakyan kag ang nasambit nga lalaki gindala sa Koronadal City Police Station para sa dugang nga imbestigasyon kag nagakaigo nga aksyon.
Photo courtesy: Lambayong Municipal Police Station
