Hugot nga bantayan sa Department of Trade and Industry (DTI) ang presyo sa bottled water, plastic drums ug uban pang sudlanan sa tubig tungod sa kabalaka sa posibleng pag-hoard ug pagpataas sa presyo samtang naghulga ang Super El Niño sa suplay sa tubig.
Kini samtang nag-andam ang gobyerno sa epekto sa Super El Niño nga gilaoman sa mga eksperto nga mahimong moabot sa “very strong” nga lebel sa dili pa matapos ang 2026 ug magpadayon hangtod sa unang bahin sa 2027.
Matud sa DTI, igo pa sa pagkakaron ang suplay sa mga nag-unang panginahanglanon, apan palig-onon niini ang price monitoring ug pakigtambayayong sa mga manufacturer ug distributor aron masiguro nga magpabiling igo ang suplay.
Gipahinumdoman usab sa ahensya ang mga negosyante ug namaligya nga dili pahimuslan ang sitwasyon pinaagi sa dili makatarunganong pagpataas sa presyo.
Gipasidaan sa DTI nga silotan ang mga makit-ang nakalapas sa mga balaod ug regulasyon. Ang hoarding ug profiteering giisip nga illegal nga price manipulation ubos sa Republic Act No. 7581 o Price Act of 1992.
Ang mga molapas mahimong mapriso og lima hangtod 15 ka tuig ug pagmulta og P5,000 hangtod P2 milyones.
Photo Courtesy: istock
