Nakaangkon ug grabeng kadaot ang usa ka pedicab human kini aksidenteng nabanggaan sa bus pasado alas 11:14 sa buntag niadtong nakalabay nga adlaw, didto sa National Highway, Purok 14, Brgy. Badas, Mati City, Davao Oriental.
Sumala sa report, ang pedicab gimaneho ni Mark Lloyd Nadonza, 22 anyos, trabahante, minyo, taga-Camansi, Brgy. Badas, samtang ang Truck Bus gimaneho ni Maximo Dagangon, 49 anyos, drayber, minyo ug residente sa Talun-talunan, Makilala, Cotabato.
Base sa inisyal nga imbestigasyon, nasayran nga nakaangon ug problema sa makina ang pedicab ug gitulak kini sa pipila ka mga tawo padulong sa kilid sa kalsada, apan sa wala damha kalit kining nabanggaan sa bus. Tungod sa kakusog sa impak, nakaangkon ug grabeng kadaot ang pedicab samtang nabuak usab ang atubangang bahin sa sakyanan.
Nakaangkon usab ug samad bun-og sa lawas ang drayber sa pedicab kinsa daling gidala sa DOPMC alang sa medikal nga pag-atiman. Sa pagkakaron nagpadayon pa ang lalom nga imbestigasyon sa mga otoridad, samtang ang bus gikustodiya na sa kapulisan alang sa tukmang disposisyon.
Photo courtesy: Mati CPS
