Gisaway ni Dumanjug Municipal Mayor Efren Guntrano “Gungun” Gica ang kabahin sa fish cage nga gibutang sa Bureau of Fisheries and Aquatic Resources (BFAR) nga walay koordinasyon ug komunikasyon ngadto sa iyang buhatan ug sa Local Government Unit sa wala pa kini gi-instalar sa kadagatan sa lungsod.
Matod pa ni Gica, natingala siya nga gitaod na ang fish cage sa BFAR nga wala man lang gipahibalo ang iyang opisina o ang munisipyo sa Dumanjug.
Gipasabot sa mayor nga kung adunay problema sa lokasyon o operasyon sa fish cage, ang LGU o munisipyo gihapon ang basulon ug maoy mapugos sa pagpapahawa o pagguba niini, hinungdan nga importante nga maapil sila sa pagplano gikan sa sinugdanan.
Hinuon giklaro sa opisyal nga dili siya supak sa proyekto apan buot niya nga masigurong sakto ug legal ang lokasyon sa mga fish cage aron dili kini makabalda sa ubang mananagat o makadaot sa kadagatan, ug kinahanglan moagi kini sa saktong survey sa dili pa ibutang.
Photo courtesy: Dumanjug – Home of Governors / Fb Page
