Nakatakdang ipahigayon sa Zamboanga del Norte Police Provincial Office ZNPPO ang 32nd National Crime Prevention Week Simulation Exercise (SIMEX) nga ipahigayon sa Dipolog City National High School nga nahimutang sa Brgy. Barra ning dakbayan karong umaabot Septyembre 2, 2026 sa alas 9:00 sa buntag.
Magpakita ang kalihukan ug usa ka simulated nga insidente sa pagpamusil aron mapalambo ang kaandam ug katakos sa pagtubag sa PNP, mga opisyal sa eskwelahan, ug mga kauban nga ahensya.
Nunot niini, gihangyo ang katawhan ilabi na sa mga anaa duol sa maong tulunghaan ug mga ginikanan nga dili angay nga magpanic kon ugaling adunay madungog nga mga boto-boto sa armas tungod kini usa lamang ka simulation exercise ug dili usa ka actual shooting or emergency.
Giawhag usab ang publiko nga dili magpatala sa pagpost dinha na sa social media ilabi na kung dili tukma ug berepikado ang impormasyon aron dili makahatag ug kabalaka sa katawhan.
Kini nga kalihukan tuyo usab nga ipahigayon nunot na sa mga nagpadayong mga pagpanghulga ug sa mga nagpanghitabo nga kapintasan sa mga tulunghaan.
Photo Courtesy: ZNPPO
