Nasikop sa kapulisan ang usa ka wanted person atol sa law enforcement operation nga gihimo sa Barangay Poblacion, Alicia, Zamboanga Sibugay alas 3:25 sa hapon niadtong nakalabay nga adlaw.
Ang operasyon gipahigayon sa mga personnel sa Alicia Municipal Police Station o Alicia MPS, kauban ang Zamboanga Sibugay 1st Provincial Mobile Force Company, Police Intelligence Unit, Zamboanga Sibugay Police Provincial Office ug Zamboanga Sibugay MARPSTA.
Nasikop ang usa ka hamtong nga lalaki, minyo ug residente sa Barangay Pandan-Pandan, Alicia, pinaagi sa Bench Warrant of Arrest nga gi-isyu sa korte may kalabotan sa paglapas sa Ecological Solid Waste Management Act of 2000 o Republic Act 9003.
Ang maong kaso nadokumento ubos sa Criminal Case No. 25-04438 ug ang korte nagtakda og 1,000 pesos nga piyansa alang sa temporaryong kagawasan sa akusado.
Human sa pagdakop, gidala ang wanted person ngadto sa Alicia MPS alang sa hustong disposisyon ug legal nga proseso. Padayon usab ang panawagan sa kapulisan sa publiko nga makigtambayayong sa mga otoridad aron mapatuman ang mga warrant of arrest ug mapadayon ang kalinaw ug kahapsay sa komunidad.
