Prayoridad karon sa City Mayor’s Office-Iligan City Anti-Drug Abuse Council ang pagtabang sa mga indibidwal ug pamilya nga naapektuhan sa ilegal nga droga ug dili lang compliance sa buhatan o ang pagsunod sa mga requirement.
Kini ang giluwatang pamahayag ni Rowel Cañete Rubio, Head sa CMO-ICADAC atol sa pagbisita sa Juander Radyo Iligan News Team.
Matud niya, bisan dili tanan mausab dayon, importante nga adunay matabangan tungod kay ang mga na-rehabilitate mahimong makatabang usab sa pagpugong sa kadaot sa droga sa komunidad.
Dugang pa niya, pinaagi sa pagkunhod sa problema sa ilegal nga droga, makatabang usab kini sa pagpakunhod sa nagkalain-laing krimen sa komunidad.
Nunot niini, gipasalamatan ni Rubio ang mga Iliganon nga misalig sa ilang trabaho, samtang iyang gipasiugda nga ang matag indibidwal nga matabangan usa na ka dakong kalampusan.
