Pinal nga ginpabakod sang Korte Suprema ang pagkansela sang Certificate of Candidacy ukon COC ni Datu Pax Ali S. Mangudadatu para sa pagka-gobernador sang Sultan Kudarat.
Sa desisyon sang korte, ginpabilin ang ruling sang Commission on Elections ukon COMELEC nga nagkansela sang COC ni Mangudadatu bangud sa isyu sa iya residency qualification sa 2022 Gobernatorial Elections.
Gin-abandona man sang Korte Suprema ang ginatawag nga “second placer rule.” Buot silingon, indi awtomatik nga mangin gobernador ang kandidato nga nakakuha sang ikaduha nga pinakadaku nga boto kon ang nagdaog madiskwalipika ukon madula sa pwesto.
Sa baylo, kinahanglan sundon ang rules on succession sa idalom sang Local Government Code. Para sa permanente nga pagkabakante sang pwesto sang gobernador, ang Vice Governor ang dapat magabulos.
Suno sa Korte Suprema, wala sang kasuguan nga nagahatag sang awtoridad nga ideklara ang second placer bilang nagdaog sa amo nga sitwasyon.
Ginpahayag man sang Korte nga mahimo ini magsupak sa kabubut-on sang mga botante bangud ang kandidato nga wala nila ginpili amo ang posible nga makapungko sa pwesto.
Bangud sini, ginmanduan si Mangudadatu nga untatan ang iya pagserbisyo bilang Gobernador kag itugyan ang pwesto sa halal nga Vice Governor, suno sa Succession rules.
Ang desisyon importante man sa palaabuton nga mga kaso sang mga lokal nga opisyal nga madiskwalipika ukon makansela ang COC. Ang desisyon sang Korte Suprema may kaangtanan sa 2022 Gobernatorial Election sang Sultan Kudarat.
Ginpatib-ong sang korte ang pagkansela sang Certificate of Candidacy ukon COC ni Datu Pax Ali S. Mangudadatu bangud sa isyu sa residency requirements.
Photo Courtesy: Supreme Court PH.
