Nakalingkawas na sa kapobrehahan ang gibanabanang 6.5 milyon ka Pilipino gikan 2023 hangtod 2025, base sa bag-ong datos sa Philippine Statistics Authority (PSA). Sumala sa updated 2025 official poverty statistics, tanang 18 ka rehiyon sa nasud nakarekord og pagkunhod sa poverty incidence sa mga pamilya.
Pinakadako ang pag-uswag sa BARMM, diin mikunhod ang poverty incidence gikan sa 26 porsyento niadtong 2023 ngadto sa 12.8 porsyento niadtong 2025. Samtang, ang National Capital Region nagpabiling adunay pinakagamay nga poverty incidence sa 0.6 porsyento.
Sa nasudnong lebel, mikunhod sa 9.7 porsyento ang poverty incidence niadtong 2025—ang pinakaubos nga lebel nga natala sa nasud. Gikan sa 17.5 milyon ka Pilipino nga nagpuyo ubos sa poverty threshold niadtong 2023, mikunhod kini ngadto sa 11 milyon niadtong 2025.
Matud sa DEPDev, nakatabang sa pagpaubos sa kapobrehahan ang mga programa sama sa 4Ps ug social pension, samtang palig-onon pa ang Trabaho Para sa Bayan plan aron makadani og investments ug makamugna og dugang trabaho.
Photo Courtesy: Wikipedia
