Giplano sa gobyerno ang pagtukod og underground cisterns sa 30 ka lugar sa Metro Manila aron tipigan ang tubig baha ug makatabang sa dugayng panahon nga solusyon sa pagbaha.
Gipahibalo ni Presidente Ferdinand Marcos Jr. ang plano niadtong Agosto 19 human sa situation briefing uban sa mga ahensiya sa gobyerno sa Metropolitan Manila Development Authority command center sa Pasig City.
Lakip sa mga giila nga posibleng lokasyon ang Rajah Sulayman, Rizal Memorial, Camp Aguinaldo ug University of Santo Tomas. Giingon ni Marcos nga makigkoordinar pa ang gobyerno sa mga lokal nga panggamhanan ug gitarget nga mahuman sulod niining Agosto ang detailed engineering sa proyekto.
Gisusi usab sa gobyerno, uban sa mga eksperto gikan sa Netherlands, ang posibilidad nga maghimo og mga imbakan sa tubig ilalom sa mga open field, sports facilities ug ubang existing structures.
Matud ni Marcos, nakatabang na ang drainage improvements, padayong dredging, 73 ka pumping stations ug 11 ka mobile pumping equipment sa pagpamenos sa epekto sa bag-o lang nga pagbaha. Gipasabot usab niya nga gitun-an ang posibilidad nga magamit pag-usab ang nakolektang tubig alang sa household, irrigation ug industrial purposes
Photo Courtesy:Bloomberg
