Subay sa Memorandum Circular No. 131 nga gipagawas sa Malacañang, gimandoan ang mga opisina sa gobyerno nga ipatuman ang angay nga alternatibong mga pamaagi sa trabaho sa mosunod nga mga lugar alang sa Huwebes, Agosto 20, 2026: National Capital Region (NCR), Abra, Benguet, Ilocos Norte, Ilocos Sur, La Union, Pangasinan, Bataan, Bulacan, Nueva Ecija, Pampanga, Tarlac, Zambales, Batangas, Cavite, Laguna, Rizal, ug Occidental Mindoro.
Gawas kung adunay laing mando gikan sa ilang tagsa-tagsa ka mga Local Chief Executives, angay usab nga ipatuman ang mga alternatibong pamaagi sa pagkat-on alang sa mga klase ug uban pang mga lakang aron masiguro ang pagpadayon sa pagtuon sa nahisgutang mga lugar, sa tanang ang-ang sa publiko ug pribadong mga tulunghaan.
Samtang, ang mga ahensya nga responsable sa paghatag og batakang serbisyo ug serbisyong panglawas, pagpangandam ug pagtubag sa kalamidad, ug uban pang mahinungdanong serbisyo kinahanglan nga magpadayon sa ilang operasyon aron masiguro ang walay hunong nga paghatag sa mga gikinahanglang serbisyo ngadto sa publiko.
Ang mga trabahante ubos sa Contract of Service (COS) ug Job Order (JO) nga nalakip sa alternatibong mga pamaagi sa trabaho magpadayon sa pagdawat sa ilang katugbang nga sweldo o bayad, subay sa kasamtangang mga lagda ug regulasyon.
Sa laing bahin, ang pagsuspenso sa trabaho o ang pagpatuman sa alternatibong mga pamaagi sa trabaho sa pribadong sektor magpabilin nga anaa sa desisyon sa pagdumala (management). Ang maong memorandum gipirmahan ni Executive Secretary Ralph Recto.
Photo Courtesy: Philippine News Agency
