Nakakuha og atensyon ang kaso sa usa ka engineer nga giingong nakadawat gihapon og sweldo bisan dugay nang wala motunga sa trabaho, diin ang iyang pagkawala mahimong miabot og 14 ka tuig.
Ang engineer nga si Joaquín García nakadawat og tinuig nga sweldo nga mokabat sa 37,000 euros o kapin P2.2 milyon. Nabutyag ang iyang dugay nga pagkawala sa dihang giplanong hatagan siya og service award alang sa iyang 20 ka tuig nga serbisyo, apan wala siya mahagilap sa mga opisyal.
Sa pag-usisa, nasuta nga labing menos unom ka tuig na siyang wala nagreport sa opisina, samtang adunay mga report nga ang iyang pagkawala mahimong miabot og 14 ka tuig. Sa iyang depensa, giingon ni García nga nagtrabaho siya apan dili regular ang iyang oras, ug miangkon usab nga nakaagi siya og problema sa workplace ug bullying.
Ang responsibilidad niini tali sa municipal water company ug city council bahin sa pagdumala kaniya. Sa ulahi, gikasuhan siya ug gipamulta og 27,000 euros o kapin P1.6 milyon tungod sa iyang dugay nga pagkawala sa trabaho, samtang padayon nga nakadawat og sweldo.
Ang maong kaso nahimong pahinumdom sa importansya sa accountability sa mga empleyado ug hustong pagmonitor sa attendance ug performance sa mga kawani.
Photo Courtesy:Project Nightfall
