Gipahugtan sa Bureau of Customs, ang pagdumala ug pagkontrol sa mga armas nga giisyu sa ilang mga sakop human sa nahitabong pagpamusil sa usa ka eskwelahan sa Zamboanga City, diin ang armas giingong gikan sa usa ka Customs Police personnel.
Tungod sa maong panghitabo, gimando ni BOC Commissioner Ariel Nepomuceno, ang komprehensibong inventory ug accounting sa tanang pusil nga anaa sa kustodiya sa mga sakop niini. Lakip usab sa susihon ang ilang pagsunod sa mga polisiya sa gun safety, hustong pag-atiman ug pagtipig sa armas, ingon man ang mga patakaran sa pagdala o pagbiyahe niini.
Sumala sa BOC, pinaagi sa maong review masiguro kung nasunod ba sa mga sakop sa BOC ang mga patakaran sa ahensya bahin sa armas, ug kung husto ba ang dokumentasyon ug pagkakustodiya niini. Dugang pa, gihatagan og 24 oras ang tanang kawani sa BOC aron motuman sa maong mando.
Kalabot niini, gipasiugda sa ahensya nga importante ang hugot nga pagdumala sa mga armas, aron mapalig-on ang seguridad ug malikayan ang posibilidad nga magamit kini sa dili hustong paagi.
Photo Courtesy: Philippine News Agency
