Ang Unitree, nga giila isip pinakadakong humanoid robot maker sa kalibotan base sa halin, motungha sa Shanghai Stock Exchange. Nakalikom na kini og 6.1 bilyon yuan o kapin 905 milyon dolyares, ug sobra 8,000 ka beses nga oversubscribed—usa ka record sa STAR Market sa Shanghai.
Nahimong popular ang Unitree tungod sa ilang mga robot nga makasayaw ug makahimo og mga lihok sama sa martial arts.
Bag-o lang, gipaila sa kompanya ang bag-ong humanoid robot nga gitawag og “Superman,” nga giingong makahimo og lukso hangtod duha ka metros ug makadagan sa gikusgon nga 12.66 metros kada segundo.
Misikat pag-ayo ang Unitree human ipakita sa ilang mga robot ang abilidad sa pagsayaw atol sa Chinese Lunar New Year gala niadtong miaging tuig.
Sukad niadto, nahimong usa kini sa mga kompanyang estratehiko sa China sa pagpalambo sa robotics, ilabina sa panahon nga nagkagamay ang workforce ug naghinay ang pag-uswag sa ekonomiya sa nasod.
Milyon-milyong dolyar ang gipuhunan sa China sa humanoid robotics, nga giisip niini nga usa sa sunod nga dagkong teknolohiya sa umaabot.
Ang pagpalig-on sa industriya sa robotics gilauman usab nga makatabang sa China sa kompetisyon niini batok sa Estados Unidos sa artificial intelligence ug advanced technology.
Photo Courtesy: The Japan Times
