Padayong gisuportahan sa Sangguniang Bayan sa Nabunturan, Davao De Oro ang mga kalihokan ug programa alang sa mga kabatan-onan aron madasig sila nga aktibong moapil sa mga kalihokan sa komunidad.
Sumala ni SB Member Bonbon Arangcon, atol sa pag interview sa Juander Radyo News Team nga importante ang paghatag og suporta sa mga kabatan-onan aron mas mapalambo ang ilang partisipasyon ug mapaduol sila sa mga positibong kalihokan.
Gipadayag usab ni SB Arangcon nga base sa iyang kasinatian isip kanhi SK Chairman sa Barangay Poblacion, naningkamot siya kaniadto sa paghatag og maayong serbisyo alang sa kabatan-onan.
Matud pa niya, ubos sa kasamtangang administrasyon ni Mayor Myrocel Balili, adunay gitagana nga pondo o budget allocation alang sa mga kalihokan sa kabatan-onan nga ipatuman sulod sa tuig.
Gilauman nga pinaagi sa padayong suporta sa lokal nga panggamhanan, mas mapalambo pa ang partisipasyon sa mga kabatan-onan sa mga programa ug kalihokan sa komunidad.
