Nagpahigayon ang Philippine Army sa On-the-Job Training (OJT) Program alang sa 33 ka mga partisipante nga mga miyembro sa kasundalohan nga nagtutok sa “Media Interview and Effective Response” alang sa mga kasundalohan isip kabahin sa programa.
Gisugdan ang maong kalihukan alas 9:00 sa buntag niadtong Agosto 17, 2026, sa Agila Hall, CGMTYS, 10ID, Philippine Army, Barangay Tuburan, Mawab, Davao de Oro.
Nakatambong isip resource speakers ang Juander Radyo Nabunturan News Team alang sa 33 ka mga partisipante. Gipasiugdahan kini sa 10th Civil-Military Operations o CMO “KALINAW” Battalion pinaagi nila Cpl. Mario Luige T. Irig ug Cpl. Febe O. Poro.
Matud pa ni Irig, nga tumong sa CMO ang pagserbisyo sa komunidad ug pagpalig-on sa relasyon tali sa kasundalohan ug katawhan pinaagi sa nagkadaiyang programa, lakip na ang paghatag og hustong impormasyon pinaagi sa media.
Gipasalamatan usab ni Irig ang maong programa tungod sa kahinungdanon niini sa pagpauswag sa kahibalo sa mga kasundalohan bahin sa CMO, diin dili lamang pakiggubat ang ilang katungdanan, kondili apil usab ang epektibong pakig-istorya ug pagpakig-uban sa komunidad.
