Padayon nga giawhag ni Cebu City Mayor Nestor Archival ang publiko, ilabina ang kabataan sa Dakbayan sa Sugbo, nga mosuporta sa mga programa sa kagamhanan alang sa pagkunhod sa basura ug pagmintinar sa kalimpyo sa palibot.
Gitumong sa mayor nga ang hustong pagdumala ug pagminus sa basura makatabang sa pagpugong sa mas grabeng pagbaha, ilabina panahon sa kusog nga pag-ulan diin mahimong mabara ang mga kanal ug drainage tungod sa mga basura.
Makatabang usab ang pagkunhod sa basura sa pagminus sa gasto sa lokal nga pangagamhanan alang sa pagkolekta, pagdala, ug hustong paglabay niini, samtang mapanalipdan usab ang kinaiyahan ug kahimsog sa komunidad.
Nagpadayon usab ang mayor sa pagbisita sa nagkalain-laing mga tunghaan sa dakbayan aron maedukar ang mga tinun-an bahin sa kamahinungdanon sa hustong paghipos, pagbulag, ug paglabay sa basura.
Gidasig ang mga kabataan ug ang tibuok komunidad nga mahimong aktibong kabahin sa mga paningkamot sa dakbayan aron mamenusan ang basura ug mapadayon ang mas limpyo, luwas, ug hapsay nga Cebu City.
Photo courtesy: NESTOR ARCHIVAL/Fb page
