Nagpahimangno ang Animal Bite Treatment Center ug City Health Office ang mga Iliganon nga dili balewalaon ang bisan unsang paak o garas gikan sa iro, iring o uban pang mananap tungod sa peligro sa rabies.
Sumala pa, nga kung napaakan o nakaskas, hugasan dayon ang samad gamit ang nagaagay nga tubig ug sabon sulod sa labing menos 15 minutos ug pakonsulta dayon sa Animal Bite Treatment Center o pinakaduol nga health facility.
Matud ni Dr. Cherlina C. Cañaveral, Medical Officer III sa City Health Office-Anti Rabies, importante ang dali nga pagpakonsulta ug pagsunod sa giresetang anti-rabies vaccination schedule.
Gipahinumdoman usab ang mga pet owner nga siguruhon nga updated ang anti-rabies vaccination sa ilang mga binuhi ug dili kini pasagdan nga makalaag, aron malikayan ang pagkatag sa rabies.
