Nakadani og atensyon sa tibuok kalibutan ang usa ka runner gikan sa United Kingdom,human makab-ot ang usa ka talagsaong Guinness World Record pinaagi sa paggantsilyo samtang mi-apil sa London Marathon.
Naila ang runner nga si Simon Fannon, nga samtang nagdagan sa lumba nagpadayon sa paggantsilyo ug nakahimo og usa ka di color nga scarf nga miabot og 5.59 meters ang gitas-on. Tungod niini, nakuha niya ang world record alang sa pinakataas nga scarf nga nahimo pinaagi sa paggantsilyo samtang nagmarathon.
Matod ni Fannon, usa sa iyang mga tumong mao ang pagpakita nga ang paggantsilyo usa ka hobby nga mahimong buhaton sa bisan kinsa, lakip na ang mga lalaki. Pinaagi sa iyang online platform, iyang gidasig ang uban nga sulayan kini isip usa ka paagi sa pagpahayahay ug pag-atiman sa mental wellness.
Dugang pa, gigamit niya ang maong marathon aron makatigom og donasyon alang sa mga charitable organizations nga nagtabang sa mga adunay sakit ug sa komunidad.
Bisan pa sa iyang atensyon tali sa pagdagan ug paggantsilyo, malampuson niyang nahuman ang tibuok marathon sulod sa 5 oras, 48 minutos ug 8 segundos, samtang nakatala usab og bag-ong world record.
Photo Courtesy: Ashford Sport
