Dakpan ang usa ka lalaki sa gipahigayon nga buy-bust operation sa kapulisan didto sa Purok 4, Barangay General Luna, sa lungsod sa Carmen, Cotabato, partikular sa daplin sa Sayre National Highway. Kini nahitabo kagabii, Hunyo 24 niining tuiga.
Giila sa mga otoridad ang suspek nga si alyas “Karl,” 31-anyos, usa ka drayber ug residente sa Purok 4, Poblacion, sakop sa nahisgutan nga lungsod. Ang maong operasyon, gipahigayon sa hiniusang pwersa sa Carmen Municipal Police Drug Enforcement Unit, Cotabato Police Provincial Office, Provincial Drug Enforcement Unit ug 2nd Provincial Mobile Force Company, uban sa koordinasyon sa PDEA Region-12.
Nakuha gikan sa dinakpan ang buy-bust money ug tulo ka sachet nga gituohang shabu nga mitimbang og 0.4 ka gramos ug nagkantidad kini og kapin o kulang P2,700. Ang mga narekober nga mga ebidensya, gidala na sa crime laboratory, aron mapailawom og quantitative ug qualitative examination. Giandam na usab sa kapulisan ang tukmang kaso batok sa suspek tungod sa paglapas sa R.A. 9165 o Comprehensive Dangerous Drugs Act of 2002.
Photo Courtesy: Carmen MPS
