Gipakusgan sa National Grid Corporation of the Philippines (NGCP) ang ilang kampanya batok sa pagpangawat ug pagpanghilabot sa mga transmission line ug tower parts, samtang gipahimangnoan ang publiko nga bug-at nga silot ang naghulat sa mga molapas sa balaod.
Gibutyag ni Ruel Cezar F. Ancheta, Mindanao Security Lead Specialist sa NGCP, nga ubos sa Republic Act No. 7832, gidili ang pagpangawat, pagputol, pagtunaw, pagtago, pagbaligya, o pag-angkon sa bisan unsang transmission line ug mga materyales nga kabahin sa power transmission system.
Matud ni Ancheta, giintensipikar sa NGCP ang ilang mga operasyon aron pugngan ang nagpadayon nga hulga sa pagpangawat sa mga kagamitan nga maoy nagsuporta sa paghatod sa elektrisidad ngadto sa mga konsumidor.
Gipasabot usab niya nga adunay mga indibidwal nga nasampolan ug napasakaan og kaso tungod sa paglapas sa maong balaod.
Ubos sa RA 7832, ang mga mapamatud-ang sad-an mahimong mahatagan og silot nga 12 hangtod 20 ka tuig nga pagkabilanggo, multa nga mokabat sa P50,000 hangtod P100,000, ug piyansa nga mahimong P40,000 o mas taas pa, depende sa desisyon sa korte ug sa kantidad sa mga materyales nga gikawat.
Gihangyo sa NGCP ang publiko nga motabang sa pagpanalipod sa mga transmission facility pinaagi sa pagreport sa mga kadudahang kalihokan aron malikayan ang kadaot sa power grid ug mapadayon ang lig-on nga suplay sa kuryente.
