Naglunsad ang Meta og bag-ong mga safety features alang sa mga kabataang adunay edad 13 hangtod 17 anyos nga naggamit og Facebook. Ubos sa pinalig-ong Teen Accounts, awtomatikong naka-private ang ilang mga account aron mas mapanalipdan ang ilang personal nga impormasyon ug mga gipatik online.
Lakip sa mga bag-ong proteksyon ang paglimite sa mga tawo nga mahimong makapadala og mensahe, maka-tag, o maka-mention sa mga menor de edad. Anaa usab ang Hidden Words feature nga awtomatikong mosala sa mga dili angay ug bastos nga mga pulong. Dugang pa niini, makadawat og pahimangno ang mga batan-on human sa 60 minutos nga paggamit sa app, samtang gikan alas-10 sa gabii hangtod alas-7 sa buntag awtomatikong mamute ang notifications ug adunay auto-reply sa mga mensahe aron madasig sila sa pagpahulay.
Sumala sa Meta, ang maong mga kausaban gitumong aron mas mapalig-on ang kaluwasan sa mga kabatan-onan sa online nga kalibotan. Alang sa mga edad 13 hangtod 15 anyos, dili basta-basta mausab ang account settings kung walay pagtugot sa ginikanan, samtang ang mga edad 16 hangtod 17 adunay mas daghang kagawasan apan adunay giya gihapon gikan sa mga ginikanan pinaagi sa Family Center. Gipasidan-an usab sa kompanya nga mahimong masuspenso o ma-disable ang account sa bisan kinsa nga magpanggap og laing edad aron malikayan ang paglapas sa mga polisiya sa plataporma.
Photo Courtesy: Philippine News Agency
