Mibalik na ang pagdawat sa Mercury Drug sa mga Guarantee Letter o GL gikan sa Department of Social Welfare and Development (DSWD) ubos sa Assistance to Individuals in Crisis Situation o AICS program.
Sugod niadtong Hunyo 22, 2026, mahimo nang magamit sa mga benepisyaryo sa AICS ang ilang GL sa 262 ka napiling Mercury Drug branches sa tibuok nasud aron makapalit og tambal ug uban pang medical supplies.
Matod ni DSWD Spokesperson Assistant Secretary Irene Dumlao, ang maong lakang kabahin sa paningkamot sa ahensya nga mapadali ug mapalapdan ang paghatag og medikal nga tabang sa mga Pilipinong nagkinahanglan.
Gipadayag usab sa DSWD nga una nang nakigtambayayong ang ahensya sa Generika Drugstore aron mas daghan pa ang mahimong kapilian sa mga benepisyaryo sa pagkuha sa ilang gikinahanglang tambal.
Ang maong programa kabahin sa direktiba sa administrasyon nga mas mapaduol ug mas mapadali ang paghatag sa serbisyo sa gobyerno ngadto sa katawhan.
Photo Courtesy: MERCURY DRUG
