Nakabutang na sa medal tally ang unang gold medal sa Pilipinas sa ikatulong Asian Youth Games nga karon gipahigayon sa Manama, Bahrain.
Gikalipay sa mga pinoy ang kadaugan ni Kram Airam Carpio, human niini makakuha og gold medal sa girls 51–55 kilograms division sa sport nga Pencak Silat.
Gipakita ni Carpio ang iyang abilidad ug determinasyon sa entablado human niya mapildi si Qiken Dwi Olifia sa Indonesia sa iskor nga 33–19.
Sa iyang pahayag, nagpasalamat si Carpio sa tanan nga mga Pilipino nga nagsuporta kanila gikan sa nasud ug sa tibuok kalibutan.
Gilauman usab nga makadugang pa og mga medalya ang uban pang atleta sa Pilipinas nga making sangka sa nagkadaiyang sports events sama sa volleyball, teqball, golf, triathlon, mixed martial arts, taekwondo, muay, athletics, boxing, cycling, weightlifting, table tennis, badminton, wrestling, swimming, jiujitsu, ug kurash.
Sumala sa organizing committee sa Asian Youth Games, kapin sa 4,300 ka mga atleta gikan sa 24 ka sports disciplines ug 253 ka events ang miapil sa maong dula.
Gipadayag sa Philippine Sports Commission (PSC) ang ilang pagpasidungog sa atleta nga si Carpio, ug miingon nga kini usa ka dakong inspirasyon alang sa kabatan-onan nga nagtinguha nga mailhan sa internasyonal nga kompetisyon.
Matod sa PSC, ang maong kadaugan nagpakita sa padayon nga paglambo sa grassroots sports development sa Pilipinas ug sa kapasidad sa kabatan-onang atleta nga makigkompetensya sa pinakataas nga lebel.
PHOTO COURTESY TO: MANILA TIMES
