Gipasidunganan sa Department of the Interior and Local Government (DILG) ang Bureau of Jail Management and Penology (BJMP) tungod sa padayon nga paningkamot niini sa pagpalig-on sa kahanas ug taktikal nga kahimtang sa mga jail personnel pinaagi sa martial arts training. Kini human sa kadaugan sa duha ka jail personnel nga nakakuha ug mga medalya sa usa ka international martial arts competition.
Sa Buffalo-Niagara Laban Laro Tournament, si Jail Officer 3 (JO3) Jupiter Villegas sa BJMP Region II nakakuha ug upat ka gold medals ug tulo ka silver medals, samtang si JO1 Charlie Sinahon sa BJMP Region I nakakuha ug usa ka gold, duha ka silver, ug usa ka bronze medal. Ang duha nagrepresentar sa Team Philippines, ug nagpakita sa pagkaepektibo sa BJMP training program.
Gipasiugda sa BJMP nga ang maong kadaugan resulta sa ilang pagpalambo sa self-defense ug taktikal nga abilidad sa mga personnel aron mapadayon ang kaluwasan sa sulod sa mga jail facility. Gibutyag ni Villegas nga ang disiplina ug istriktong routine gikan sa sayong jogging hangtod sa 8-to-5 duty ug maayong pagkaon mao’y nakatabang kanila sa kalampusan.
Gipasidunganan usab sa duha si DILG Undersecretary Serafin Barretto Jr., kinsa nagsugod sa “No Guns in Jail” program sa dihang siya pa ang BJMP Chief. Ang programa nagpalig-on sa abilidad sa mga jail officer sa self-defense nga walay pagsalig sa armas.
Sumala sa BJMP, samtang nagpadayon ang hagit sa 286% jail congestion rate sa nasud, kinahanglan gyud nga mapalig-on ang taktikal ug depensang kahanas sa mga personnel aron mapanalipdan ang mga Persons Deprived of Liberty (PDLs) ug mga jail officers.
Kini nga kalihukan usa ka pagsunod sa panawagan ni Presidente Ferdinand Marcos Jr. nga magpabilin ang disiplina, dedikasyon, ug serbisyo alang sa mas luwas ug malinawon nga nasud.
Photo courtesy: DILG Philippines
