Nakab-ot ni Pinay Tennis Star Alex Eala ang iyang labing taas nga karera sa Women’s Tennis Association (WTA) ranking human siya misaka sa ika-53 nga puwesto, gikan sa iyang miaging ranggo nga ika-54.
Base sa pinakabag-ong listahan nga gipagawas sa WTA, nakab-ot ni Eala ang maong ranggo bisan pa man nga sayo natapos ang iyang partisipasyon sa Japan Women’s Open.
Ang 20-anyos nga tennis player nagpadayag sa padayon nga pag-uswag sa iyang karera sa internasyonal nga kompetisyon. Kaniadtong Oktubre 6, na-record ni Eala ang ika-54 nga posisyon, ug karon mas misaka pa kini nga nagpasabot sa iyang padayon nga paglambo ug determinasyon sa tennis.
Sa pagkakaron, nangandam si Eala alang sa Guangzhou Open sa China karong Oktubre 21, diin siya magaduwa sa singles ug doubles categories. Kauban niya sa doubles ang Ukrainian player Nadiia Kichenok sa buntag, samtang sa hapon moduwa siya sa singles event.
Padayon ang pagpaningkamot ni Eala sa pagrepresentar sa Pilipinas sa mga dula sa gawas sa nasud ug sa pagpalig-on sa iyang ngalan sa kalibutanong tennis arena.
Photo courtesy to:WION
