Gipasigarbo ni Department of Budget and Management (DBM) Secretary Amenah Pangandaman nga nagpabiling lig-on ug mas kusgan pa ang ekonomiya sa Pilipinas base sa datos sa ikaduhang kwarter sa tuig 2025.
Sa iyang pakigpulong atol sa Philippine Economic Briefing nga gipahigayon sa Cagayan de Oro City kagahapong adlawa, Oktubre 20, gipahibalo ni Pangandaman nga misaka sa 5.5% ang gross domestic product (GDP) sa nasud, usa ka timailhan sa padayon nga kalig-on ug pagkusog sa ekonomikanhong aktibidad.
Matod sa kalihim, usa sa mga nakahatag ug positibong kontribusyon mao ang pagpugong sa inflation rate nga miubos sa 1.7% niadtong Setyembre, ug ang taas nga employment rate nga miabot sa 96.1%.
Gipasidunggan usab ni Pangandaman ang Northern Mindanao (Region 10) isip importante nga pwersa sa paglambo sa nasudnong ekonomiya, tungod kay kini ang “food basket” sa Pilipinas, nga nagmugna sa dagkong kantidad sa mais, lubi, saging, ug uban pang agricultural commodities.
Gihulagway usab niya nga ang rehiyon usa na karon sa sentro sa agri-industrial development, nga naghatag ug daghang oportunidad sa panginabuhi ug pagnegosyo sa Mindanao.
Sa laing bahin, gipahibalo ni Pangandaman nga padayon ang DBM sa pagpanguna sa mga reporma sa budget priorities, pinaagi sa bag-ong Government Procurement Act, nga iyang gihulagway nga “pinakadakong anti-corruption measure sa kasaysayan sa Pilipinas.”
Ang maong balaod nagtinguha sa pagpalig-on sa transparency, pagbatok sa korapsyon, ug pagdali sa procurement process pinaagi sa digitalization.
Sumala pa sa DBM, ang paglambo sa ekonomiya usa ka kolektibong kalampusan sa gobyerno, pribadong sektor, ug katawhan, ug ang tumong karon mao ang pagpadayon sa inclusive growth nga makabenepisyo sa tanang rehiyon sa nasud.
Photo courtesy: Fibre
