Subling ablihan sa Nobyembre ang electronic visa (e-visa) nga aplikasyon alang sa mga Chinese nga bisita sa Pilipinas.
Sa usa ka pamahayag, ang Philippine Embassy sa Beijing mipahibalo nga ang mga Chinese applicants nga mobisita sa nasud alang sa turismo o negosyo mahimong maka-apply og eVisa kung kini magpabilin sa nasud nga dili molapas sa 14 ka adlaw ug ang punto sa pagsulod kinahanglan sa mga tugpahanan sama sa Ninoy Aquino International Airport (NAIA) o Mactan-Cebu International Airport.
Kung nagpabilin kini sa nasud sa sobra sa duha ka semana, mahimo na kini mag-aplay alang sa usa ka conventional visa sa labing duol nga Visa Application Centers nga ablihan sa Beijing, Chongqing, Fuzhou, Guangzhou, Hong Kong, ug Shanghai.
Gikatakda nga magpagawas sa mga detalye sa e-Visa ang Embahada sa Pilipinas alang sa pagsumite sa mga kinahanglanon, lakip na ang kalambigit nga website ug mga pamaagi.
Kahinumduman nga gisuspenso sa Pilipinas ang pag-isyu og e-Visa sa mga Chinese nga turista aron mapugngan ang pagdaghan sa mga illegal online gaming workers sa nasud human sa nabutyag nga mga krimen nga may kalabotan sa Philippine Offshore Gaming Operators (POGOs) nga miresulta sa pagkasikop sa daghang Chinese nationals.
Sa 2019, ang China ang ikaduha nga pinakadako nga gigikanan sa mga langyaw nga turista sa Pilipinas, nga mikabat sa 1.74 milyon.
Photo Courtesy to:Pilipino Mirror
