Miapela ang Catholic Bishops’ Conference of the Philippines (CBCP) sa mga magbabalaod, independent oversight bodies, ug prosekusyon nga ahensya nga paspas-on ang imbestigasyon ug panubag bahin sa giingong korapsyon sa mga flood control project.
Matud ni CBCP president ug Kalookan Bishop Pablo Virgilio Cardinal David, kinahanglan seguradohon nga ang tanang kontrata sa gobyerno ginahimo uban sa transparency ug integridad, ug walay bisan gamay nga pagpangurakot.
Gipasiugda ni David nga igo na ang naunang mga imbestigasyon nga natapos lang sa kompromiso ug political nga kasabutan. Dili na matud pa dapat tugotan nga mahitabo pa kini pag-usab.
Kahibaluang lakip sila nga ning salmot sa gipahigayong Trillion Peso March kagahapong adlawa diin nahimo kining higayon alang sa pag-ampo, panaghiusa, ug paglihok alang sa hustisya ug panubag.
Matud sa simbahan, ang kalihukan dili alang sa political nga destabilization kondili aron mapalig-on ang demokrasya pinaagi sa pagpahinumdom nga ang tanang lider kinahanglang manubag ubos sa Konstitusyon ug sa rule of law.
Photo credit: CBCP
