Natala ang 8 ka indibidwal ang kumpirmadong casualty human gibanlas sa tubig-baha ang syudad sa Valencia diin kapin 500 ka pamilya o liboan ka residente ang mibakwit sa evacuation center sa niaging adlaw.
Sa pakighinabi sa Juander Radyo Malaybalay kang CDRRMO Chief Jun Ray Valero, gibutyag nga kini base sa datus sa gihimong Rapid Damage Assessment And Needs Analysis (RDANA) kagahapon Setyembre 18, 2025 kung asa 12 ka balay usab ang naanod sa baha.
Giilang ang mga namatay nga sila Larry Laboy taga Purok 20, Poblacion, Jaya Taña Viña taga Purok 16, King Winston A. Adran, 13 anyos taga Purok 6A, Johny Borbon, 4 anyos taga Purok 16, Deejay Ark Taña Viña, 48 anyos taga Purok 13, Consolacion Dina, 2 anyos taga Purok 13, Usa ka baby boy (wala’y pangalan) taga Purok 20, Princess Kyarah Dacoycoy, 17 anyos sa Purok 20.
Nagpadayon pa usab ang search, rescue, ug retrieval operations nga gihimo sa PNP, Philippine Army, BPAT, ug PDRRMO-Bukidnon sa upat ka biktima nga pabiling missing ug pangapod-apod sa hinabang naidtong tua sa Valencia City gymnasium.
Samtang gibutyag usab ni Anecito Torayno, Jr., Chief sa Warnings and Operations Section sa PDRRMO-Bukidnon nga gipaubos kagahapon sa Red Alert Status ang probinsya o gipatuman ang Emergency Preparedness and Response Protocols ilawom sa “Charlie” o High-Risk Level, diin gitutokan ang critical nga mga lakang sa retrieval, rescue, evacuation, ug rapid assessment.
Base sa inisyal niini Rapid Damage and Needs Assessment (RDANA), ang Purok 20, Poblacion, Valencia City maoy labing naapektuhan, ug lakip sa nabahaan ang Tugaya, Lumbo, Barobo, ug Mailag, ingonman lungsod sa Maramag, kung asa apektado usab ang mga estudyante ug pasilidad sa Central Mindanao University (CMU).
via: CDRRMO – Valencia City
