Nakatakdang mogasto ang Department of Information and Communications Technology (DICT) ug kapin sa ₱3 bilyon aron makapalit ug kapin sa usa ka milyon nga SIM card nga ipang-apod-apod sa mga estudyante sa publikong eskwelahan sa tibuok Pilipinas.
Ang Bayanihan SIM Project, usa ka spin-off sa Free Public Internet Access Program (FPIAP), nagtumong sa paghatag ug libreng SIM cards ug binuwan nga data bundles sa mga estudyante gikan sa 360 ka pampublikong tunghaan, kasagaran nahimutang sa geographically isolated ug disadvantaged areas.
Ubos sa proyekto, ang matag benepisyaryo makadawat og data bundle nga 25 GB matag bulan, balido sulod sa 12 ka bulan human ma-activate. Ang DICT nagtakda ug higpit nga mga timeline alang sa pagpaaktibo sa serbisyo—45 ka adlaw alang sa mga lugar nga kulang sa serbisyo ug hangtod sa 240 ka adlaw alang sa mga lugar nga wala pa naserbisyuhan kaniadto nga nanginahanglan pagtukod sa imprastraktura.
Ang nagdaog nga telecommunications provider kinahanglang maghatod ug advanced mobile services, lakip ang 4G, LTE, o 5G connectivity, ug pagseguro sa kasaligang data service pinaagi sa pag-integrate sa fiber, microwave, ug satellite solutions aron mamentinar ang serbisyo bisan sa peak demand.
Gawas sa infrastructure deployment, ang mananaog nga bidder moabag sa DICT sa distribution ug on-site registration sa SIM cards.
Ang pondo alang sa proyekto maggikan sa espesyal nga account sa DICT alang sa FPIAP, nga adunay badyet nga ₱7.5 bilyon alang sa tuig.
via: Technobaboy
