Gikumpirma sa Philippine Amusement and Gaming Corporation (PAGCOR) nga mikunhod ang ilang kita human gitangtang ang mga link sa online gambling gikan sa mga e-wallet platforms.
Kini ang gipadayag ni Atty. Jessa Mariz Fernandez, Offshore Gaming Licensing Assistant Vice President, sa gihimong pagdungog sa Committee on Games and Amusement.
Sumala ni Fernandez, naalkansi og halos 40-50 percent ang kita sa PAGCOR sulod lang sa duha ka semana, human gi-delist ang mga online gambling sa mga payment platforms.
Samtang bisan pa sa nahitabong pagkaalkansi, gibutyag ni Fernandez nga dili total ban ang gustong ipatuman sa PAGCOR, apan usa lang ka hugot nga regulasyon sa industriya, subay sa miaging pamahayag ni Chairman Alejandro Tengco.
Gihatagan usab ug gibug-aton ni Senador Erwin Tulfo, chairman sa komite, nga ang pagkunhod sa kita nagpamatuod nga adunay epekto ang gihimong lakang batok sa online gambling, ilabi na sa paggamit sa e-wallets sa mga transaksyon.
Samtang, matud pa usab ni Senadora Risa Hontiveros nagpadayon gihapon ang paggamit sa e-wallet platforms alang sa pagdeposito ug pag-withdraw sulod mismo sa mga online gambling platform.
Dugang pa niya, miabot og six-digit o hangtod P500,000 ang makasulod ug mogawas sa mga transaksyon sa maong mga plataporma.
Gipasabot usab niya nga kung sa online banking, kung molapas sa P50,000, dili na kini ma-transfer, apan sa e-wallet platforms, posible nga makalusot ang transaksyon hangtod sa tunga sa milyon ka pesos alang sa sugal.
Sa laing bahin, mohatag og show cause order ang komite ngadto sa opisyal sa Meta Philippines tungod sa pakyas niini nga pagtambong sa pagdungog kabahin sa online gambling.
Sa sulat nga gipadala kang Senador Erwin Tulfo, giingon ni Genixon David, public policy manager sa social media giant, nga naa sa Singapore ug Amerika ang ilang authorized representatives hinungdan nga wala kini makaatubang sa pagdungog.
Bisan pa, andam sila nga makigtagbo kang Tulfo ug magsumite og position paper. Apan, nasuko si Tulfo ug giingon nga murag nagbuot ang Meta sa Senado.
Nagpahimangno siya nga posibleng ipatawag ug ipabilanggo ang opisyal kung magpadayon ang kakulang sa pagtahod sa komite.
Photo courtesy:Rappler
